Sleutelwoorde

,

Mense het al meer as een maal vir my gesê ek leef in La La Land, terwyl ek myself sien as ‘n praktiese en veral pragmatiese mens. As dit as ‘n belediging bedoel was, het ek nuus vir daardie mens! Nadat ons vandag La La Land gesien het, woon ek graag daar en sien ek dit voortaan as ‘n kompliment.

La La Land was barstens toe vol kleur en klank en die musiek spoel oor jou soos groot borrels, maar daar is ‘n onderliggende melancholie. Drome en realiteite, menslike tekortkominge bly in pas met die karakters, anders as die oënskynlike vrolikheid met die kleurvolle rokkies en danspassies.

Dit was ontvlugting van die verskrikking van al die wêreldgebeure op die oomblik, maar ontvlugting terug na die realiteit. Drome het ‘n prys. Moderne sprokies het nie meer ‘n prins en prinses wat ewig en gelukkig leef nie, en die nagtegaal se klanke slaan soms dof deur.

Daar het ‘n meisietjie van omtrent 12 langs my gesit en haar so ingeleef in die storie, en kort-kort in ademlose verwondering iets vir hierdie vreemde tannie gefluister. Ek het gehoop ek kry na die fliek kans om met haar te gesels, ek sou vir haar wou sê: Werk hard en hou aan droom. Dis enetjie wat die fliek verstaan het, wat benoud was toe dinge nie loop soos sy in haar romantiese meisiekindkop saamdroom nie. Wat fluister, sy wil ook na daardie plekke toe gaan. Dit het my half hartseer gemaak om te dink hier sit ek, ek kan vir haar vertel ek was inderdaad al in Hollywood in Los Angeles CA, Parys en Boulder City NV waar die fliek afgespeel het, waar haar jong gemoed heen hunker.

Werk hard en hou aan droom, vreemde dogtertjie, ek weet jy sal eendag plekke gaan, dinge doen en beleef, teleurgestel word, maar hou aan droom en leer en leef. Ons het almal ‘n La La Land. Vind joune.

Related image

Here’s to the ones who dream, foolish as they may seem. Here’s to the hearts that ache. Here’s to the mess we make. She captured feeling, sky with no ceiling, the sunset inside with rain. Here’s to the ones who dream, foolish as they may seem. Here’s to the hearts that ache. Here’s to the mess we make. (Mia, singing)

Advertisements